Үндэслэл

“Бизнесийн төгөлдөршил” тогтолцоо сайжруулалтын цогц хөтөлбөр нь байгууллагын менежментийн тогтолцоо болон процессыг тасралтгүйгээр сайжруулж, бэхжүүлэх замаар бүтээмжийг нэмэгдүүлж, сонирхогч талуудад илүү их үнэ цэнийг бий болгоход чухал ач холбогдолтой юм. Бизнесийн төгөлдөршил нь байгууллагын менежментийн тогтолцоо гэхээс илүүтэйгээр хийж буй бүх зүйлээ (үүнд манлайлал, стратеги, хэрэглэгч, мэдлэгийн менежмент, хүн хүч, процесс, үр дүн гэсэн үндсэн 7-н талбарыг хамарна) төгс төгөлдөр түвшинд гүйцэтгэж, улмаар хамгийн сайн бизнесийн үр дүнд хүрэхийг хэлнэ.

Бизнесийн төгөлдөршлийн загвар нь 1988 онд анх боловсруулагдсан бөгөөд өдгөө олон улс орнууд өөрийн хэрэгцээ, шаардлага, онцлогт тулгуурлан загварыг шинэчилж,   үнэлгээ, дүн шинжилгээ хийж төгөлдөршилд хүрэхэд нь байгууллагуудад туслалцаа үзүүлсээр байна. Аливаа байгууллагын үйл ажиллагааг төгөлдөршүүлэх нь хэрэглэгчийн хэрэгцээ шаардлагад түргэн хариу үзүүлэх, байгууллагын мэдээлэлд дүн шинжилгээ хийж шийдвэр гаргалтыг сайжруулах, мэдлэг хуваалцах таатай орчныг бүрдүүлэх, үйл ажиллагааг баримтжуулах замаар тасралтгүй сайжруулах тогтолцоог бий болгоход чухал нөлөөтэй. Иймд төслийн хүрээнд бизнесийн төгөлдөршлийн тогтолцооны дагуу дотоод үнэлгээг хийх, түүнд дүн шинжилгээ хийж, цаашдын сайжруулалт хийх алхмуудыг тодорхойлох замаар бүтээмж, чанарыг дээшлүүлэх үйл ажиллагааг системтэйгээр хэрэгжүүлэхэд чиглэгдэх юм.

Төсөл хэрэгжүүлснээр гарах үр дүн

Үйл ажиллагаанд Бизнесийн төгөлдөршлийн тогтолцоог хэрэгжүүлснээр дараах үр дүн гарна. Үүнд:

• Үйлдвэрийн одоогийн түвшинг үнэлгээний системийн дагуу тодорхойлж, сайжруулах боломжит талбаруудыг тодорхойлж, сайжруулалтын арга хэмжээ авч, үр дүн ба үр нөлөө сайжирна
• Цаашдын төлөвлөлтийг системтэйгээр хэрэгжүүлдэг болно
• Бүтээмж, чанарыг дээшлүүлнэ.

Төсөл үргэлжлэх хугацаа

Байгууллагын үйл ажилагааны чиглэл, хэмжээнээс хамаараад 3–6 сарын хугацаанд хэрэгжинэ.

Үндэслэл

Японы эдийн засгийн гайхамшгийн гол үндэс болсон бүтээмжийг нэмэгдүүлэх “Ажлын соѐл 5С” хөтөлбөр нь аливаа сайжруулалтын үндэс суурь юм. Энэ нь Япон, Сингапур, Малайз зэрэг АББ-ын гишүүн 20 гаруй улс орнуудын практикт амжилттай хэрэгжиж ирсэн тэргүүн туршлага юм.

Ажлын соёл 5С-ийн хөдөлгөөнийг байгууллагад өрнүүлэх замаар өрсөлдөх чадвар, ашигт ажиллагааг нэмэгдүүлж, байгууллагын соёлын зөв суурийг тавьж, аюулгүй, эмх цэгцтэй, эрүүл цэвэр орчныг бүрдүүлж, хүн бүрт бүтээмжийн ухамсрыг суулгах, улмаар тасралтгүй сайжруулалтын соёлыг төлөвшүүлэх хэрэгцээ шаардлагыг ханган ажиллахад тусалдаг бүтээмж дээшлүүлэх үндсэн аргуудын нэг юм. 

Төсөл хэрэгжүүлснээр гарах үр дүн

Үйл ажиллагаанд Ажлын байрны соёл 5С-ийн арга хэрэгслийг нэвтрүүлснээр дараах үр дүн гарна. Үүнд:

- Ажлын байрны эмх цэгц сайжирна;

- Ажилчдын оролцоо нэмэгдэнэ;

- Байгууллагын соёл сайжирна;

- Аюулгүй, цэвэр орчныг бүрдүүлнэ.

Төсөл үргэлжлэх хугацаа

Байгууллагын үйл ажилагааны чиглэл, хэмжээнээс хамаараад 2–4 сарын хугацаанд хэрэгжинэ.

Үндэслэл

Эрсдэл гэдэг нь тодорхой бус байдлын үр нөлөө буюу  өөрөөр хэлбэл аливаа болж байгаа зүйлийн талаар тодорхой байх боломжгүй байдал. Энэ нь ихэнхи тохиолдолд сайнаас илүү муу үр дагаварт хүргэдэг гэж үздэг.
Байгууллагууд эрсдлийн менежментийн гол зорилгыг аливаа бизнест учирч буй эрсдлийг бүрэн арилгах гэсэн буруу ойлголттой байдаг. Гэвч эрсдлийг бүрэн арилгах нь бараг боломжгүй зүйл юм. Үүний оронд эрсдлийн менежмент нь тухайн байгууллага өөрийн эрсдлийн түвшингийн талаар тодорхой дүр зурагтай болох, дараа нь тэдгээр эрсдлийг хэвээр үлдээн баталгаажуулах эсвэл бууруулах арга хэмжээ авах зэргийг тодорхойлох явдал юм.
Эрсдлийн менежментийн янз бүрийн аргууд байдаг бөгөөд байгууллагууд ямар аргыг баримтлахаа өөрийн онцлогт тохируулан сонгох шаардлагатай байдаг.

Төсөл хэрэгжүүлснээр гарах үр дүн

Үйл ажиллагаанд Эрсдлийн менежментийг хэрэгжүүлснээр дараах үр дүн гарна. Үүнд:

• Үйл ажиллагааны эрсдүүдийг тодорхойлох, түвшингээр ангилах;
• Аливаа эрсдлийг бууруулах, арилгах, хянах боломжтой болох;
• Эрсдэлт хүчин зүйлийн үед авах арга хэмжээг тодорхой болгож, журмаар зохицуулдаг болох
• Эрсдлээс үүдэж гарах зардал, хохирлыг бууруулах

Төсөл үргэлжлэх хугацаа

Байгууллагын үйл ажилагааны чиглэл, хэмжээнээс хамаараад 3–6 сарын хугацаанд хэрэгжинэ.

Үндэслэл

Бүтээмжийн менежментийн гол зарчим нь Төлөвлө-Хий-Хяна-Сайжруул гэсэн тасралтгүй сайжруулалтын цикл байх бөгөөд бүтээмж нь “Өнөөдөр нь өчигдрөөсөө илүү сайнаар хийх, маргааш нь өнөөдрөөс илүү сайнаар гүйцэтгэх” хэмээх байгууллагын соёлыг бий болгох гараатай, бариагүй аян юм.   

Төлөвлөх үе шатанд бид байгууллагын манлайлал, бодлогыг бүтээмжийн чиг баримжаатай хэрэгжүүлэх, хөтөлбөрийн нөөцийг хуваарилах, системийг бий болгох асуудлыг авч үзнэ. Хэрэгжүүлэх үе шатанд бүтээмжийг дээшлүүлэх оновчтой арга хэрэгслүүдээс (Ажлын соёл 5С, Кайзэн саналын систем, Чанарын дугуйлан, Ногоон бүтээмж, МУЗТ гэх мэт) сонгон хэрэгжүүлж, байгуулллагын чанар, зардал, цаг хугацаатай холбоотой чадамжийг дээшлүүлнэ. Хэмжилт дүн шинжилгээг үр дүнтэй хийж өөрчлөлт, сайжруулалтын үр нөлөөг хэмжинэ. Бүтээмжийг хэмжсэнээр тухайн байгууллага хөдөлмөр, үйл ажиллагаа болон капиталын бүтээмжийн өөрчлөлт, түүний үр ашигтай байдлыг ойлгохоос гадна ижил төстэй байгууллагатай өөрсдийгөө харьцуулах боломж нээгддэг. Дүн шинжилгээнд үндэслэн байгуулллага дараагийн шатны сайжруулалтыг төлөвлөнө. 

Ийнхүү бүтээмжийн арга хэрэгслүүдийг цогцоор нь хэрэгжүүлснээр байгууллагад тасралтгүй сайжруулалт хийх нөхцөл сайн бүрдэхээс гадна ажилчдын сэтгэл ханамж, бизнесийн оролцогч талуудын гол түлхүүр үзүүлэлтүүдийг сайжруулахад дэмжлэг болж өгдөг.

Төсөл хэрэгжүүлснээр гарах үр дүн

Үйл ажиллагаанд Бүтээмжийн менежментийн хөтөлбөрийг нэвтрүүлснээр дараах үр дүн гарна. Үүнд:

• Бүтээмж, чанар дээшилнэ;
• Ажилчдын идэвх санаачлага, бүтээлч байдал сайжирна;
• Ашигт ажиллагааг нэмэгдэнэ;
• Үйл ажилагааны хяналт сайжирч, үргүй зардал, үнэ цэнэ бүтээдэггүй ажлуудыг буруулснаар үр ашиг, үр дүн сайжирна. 

Төсөл үргэлжлэх хугацаа

Байгууллагын үйл ажилагааны чиглэл, хэмжээнээс хамаараад 6–12 сарын хугацаанд хэрэгжинэ.

Үндэслэл

Өнөөгийн хурдацтай хувьсан өөрчлөгдөж буй бизнесийн нөхцөлд төрийн болон хувийн хэвшлийн аль ч байгууллагад тасралтгүй сайжруулалт зайлшгүй юм. ‘Кайзэн’ гэдэг нь Япон хэлэнд ‘тасралтгүй сайжруулах’ гэсэн утгыг агуулдаг бөгөөд байгууллагын өдөр тутмын үйл ажиллагааны явцад бүтээмжийг бууруулж байдаг нийтлэг 7 алдагдлыг тодорхойлсноор тэднийг бууруулах, улмаар бүрэн арилгах сайжруулалтын саналуудыг цуглуулах, системтэйгээр хэрэгжүүлэх боломжтой болдог. Энэхүү арга хэмжээний хүрээнд үйл ажиллагааны явц дараалалд илэрч буй нэмүү өртөг бий болгохгүй алдаануудыг олж илрүүлж, алхам алхмаар, тасралтгүй сайжруулснаар өндөр бүтээмжтэй ажиллах боломжтой болно. 

Төсөл хэрэгжүүлснээр гарах үр дүн

Үйл ажиллагаанд Кайзэн саналын системийн аргыг нэвтрүүлснээр дараах үр дүн гарна. Үүнд:

• Нэгдсэн мэдлэг ойлголттой болно.
• Бүтээмж, чанар дээшлүүлэх буюу үр ашиг, үр дүн нэмэгдэнэ
• Ажилтнуудын хандлага сайжирна
• Алдагдлыг бууруулна
• Тасралтгүй сайжруулалтын соёл бий болно
• Ажилтнуудын бүтээлч байдал дээшилнэ
• Хэрэглэгчдийн сэтгэл ханамж нэмэгдэнэ

Төсөл үргэлжлэх хугацаа

Байгууллагын үйл ажилагааны чиглэл, хэмжээнээс хамаараад 3–6 сарын хугацаанд хэрэгжинэ.

Үндэслэл

Материалын урсгал зардлын тооцоолол нь хаягдал болон процессын алдагдлыг  бууруулахад туслах, илүү үр дүнтэйгээр  материалын үр ашигтай хэрэглээг дэмжих, Япон улсад төдийгүй, Азийн улс орнуудад шинээр түрэн орж ирж буй менежментийн арга хэрэгсэл юм.

Энэ нь бүтээмжийг нэмэгдүүлж, зардлыг бууруулах, үр дүнтэйгээр асуудлыг шийдвэрлэлтийн гол түлхүүр болох  материалын  урсгалын ил тод байдлыг нэмэгдүүлдэг. Байгууллагын үйл ажиллагааны нуугдмал зардлыг илрүүлж, ашигт ажиллагааг нэмэгдүүлж, ажлын чанар, байгууллагын чанарын соёлыг бүрдүүлэхэд өндөр ач холбогдолтой. 

Түүнчлэн Ногоон бүтээмжийн нэг арга хэрэгсэл ба байгууллага болон үйлдвэрийн газруудад амжилттай хэрэгжүүлж, үр дүн гаргах бүрэн боломжтой юм. МУЗТ нь бүтээгдэхүүн, үйлчилгээ, хэмжээ, бүтэц, нягтлан бодох бүртгэлийн системээс үл хамааран материал, эрчим хүч ашигладаг бүх байгууллагад хамаарна.

Төсөл хэрэгжүүлснээр гарах үр дүн

Үйл ажиллагаанд Ногоон бүтээмжийн арга хэрэгслийн нэг болох МУЗТ-ын аргыг нэвтрүүлснээр дараах үр дүн гарна. Үүнд:

- Материал, эрчим хүчний зардлыг хэмнэх;

- Ашигт ажиллагааг нэмэгдүүлэх;

- Байгаль орчин үзүүлэх сөрөг нөлөөллийг бууруулах боломж бүрдэнэ. 

Төсөл үргэлжлэх хугацаа

Байгууллагын үйл ажилагааны чиглэл, хэмжээнээс хамаараад 3–6 сарын хугацаанд хэрэгжинэ.

Үндэслэл

Мэдлэгийн менежмент бол байгууллага дахь мэдлэг, мэдээллийг бий болгох, ашиглах, түгээх, хуваалцах үйл ажиллагааг зохицуулдаг менежментийн арга хэрэгсэл юм. Мэдлэгийн менежментийн хэрэгжүүлснээр байгууллагын гүйцэтгэл, өрсөлдөх чадвар сайжирч, шинэлэг санал санаачлагуудыг цуглуулан инновацыг хөгжүүлж, мэдлэг туршлагаа хуваалцах орчинг бүрдүүлж, байгууллагын тасралтгүй сайжруулалтын хандлага бий болох юм. “Мэдлэгийн менежмент” хөтөлбөр нь 1991 оноос хойш Олон улс төдийгүй Монгол улсад амжилттай хэрэгжсээр байгаа бөгөөд ихэнхи томоохон компаниуд, төрийн захиргааны болон төрийн бус байгууллагууд дотоод үйл ажиллагаандаа мэдлэгийн менежментийг бизнесийн стратеги, мэдээллийн технологи, хүний нөөцийн нэгэн бүрэлдэхүүн хэсгийн түвшинд авч үзэж хэрэгжүүлж байна. Ингэснээр байгууллага мэдлэг, туршлагаа илүү сайн хамгаалж, үр дүнтэй ашиглах, мэдлэгээ хөгжүүлэх, хуваалцах хүчин чармайлтаа сайжруулж, бүтээмжээ дээшлүүлэх боломжийг олгодог, жишээлбэл:

• Байгууллагуудад өнгөрсөн алдаанаас суралцаж, амжилтаа ахиулахад тусалдаг;
• Зөв чадамж, ур чадварыг хөгжүүлэх, хуучирсан, хэрэгцээгүй болсон өгөгдөл, мэдлэгийг арилгахад урт хугацааны анхаарал хандуулдаг;
• Байгууллагын инновац хийх чадварыг сайжруулдаг;
• Байгууллагын үндсэн мэдлэг, чадвараа хамгаалах чадварыг дээшлүүлдэг;
• Байгууллага ажилчдын туршлага, мэдлэгийг үр дүнтэй ашигласнаар бүтээмж, үр ашгийг дээшлүүлж, ажилчдын шийдвэр гаргах чадварыг сайжруулдаг.

Мэдлэг нь байгууллагын стратегийн түвшний хөрөнгө тул мэдлэгийн хөрөнгийг тодорхойлох, хэмжих нь амин чухал ач холбогдолтой юм. Энэ хүрээнд МБТ-ийн экспертүүд зөвлөгөө өгөх, сургалт явуулах замаар мэдлэгийн менежментийн талаарх ажилтнуудын дараах мэдлэгийн зөрүүг арилгаж, бодит үр дүнг бий болгоход чиглэх юм:

• Мэдлэгийн менежментийг байгууллагын тогтолцоо болгон хэрэгжүүлэх мэдлэг, ур чадвар дутмаг;
• Баримтжуулсан мэдээллийг илүү сайн удирдах, үнэ цэнийг нэмэгдүүлэх, эцсийн дүндээ бүтээмжийг нэмэгдүүлэхийн тулд дараагийн алхамд шилжих зайлшгүй шаардлага;
• Мэдлэгийн хөрөнгийг тодорхойлох, хэмжих, түүнийг өсөлтийн хөшүүрэг болгон ашиглах туршлага дутмаг.

Төсөл хэрэгжүүлснээр гарах үр дүн

• Ажилтнуудын ММ-ийн тогтолцооны талаарх ойлголт, мэдлэг сайжрах
• Цаашид ижил төрлийн төслийг бие даан хэрэгжүүлэх, хянах, үр дүнг тооцох ур чадвартай болох
• Үндэсний хэмжээнд ММ-ийн тогтолцоог хэрэгжүүлсэн тэргүүн туршлага бүхий байгууллага болох 

Төсөл үргэлжлэх хугацаа

Байгууллагын үйл ажилагааны чиглэл, хэмжээнээс хамаараад 6–12 сарын хугацаанд хэрэгжинэ.

Үндэслэл

Процессын хандлагын үр өгөөж нь байгууллагын үйл ажиллагааг бүх түвшинд сайжруулах, цаашид тогтвортой хөгжих үндэс суурийг тавих ач холбогдолтой учраас чанарын менежментийн тогтолцооны хүрээнд болон менежментийн бусад тогтолцооны хүрээнд процессын хандлагыг хэрэгжүүлэх нь стратегийн чухал шийдвэр юм. Хэрэгжүүлэлтийн гол  зарчим нь хатуу хяналт буюу үнэлгээний систем тогтоох бус харин, чанарын соёлыг байгууллагын бүх ажилтнуудын дунд хэвшүүлэхэд орших бөгөөд энэ арга нь чанарын менежментийн тогтолцооны 7-р бүлэгт хамаарагдана. Тогтолцооны процессуудын харилцан уялдаа, харилцан хамаарлыг хянах нөхцлийг бүрдүүлснээр байгууллагын гүйцэтгэлийг бүхэлд нь сайжруулах боломжийг олгоно. Чанарын Менежментийн Тогтолцооны бүлэг стандартад “Процессын хандлага” буюу процессын системчилсэн удирдлагын зарчим, түүний зориулалт, ач холбогдол, хэрхэн хэрэгжүүлж ашиглах тухай ойлголтыг заасан байна. 

Төсөл хэрэгжүүлснээр гарах үр дүн

Үйл ажиллагаанд Процессын хандлагыг хэрэгжүүлснээр дараах үр дүн гарна. Үүнд:

• Үйл ажиллагааны процессууд тодорхой болно 
• Бүтээмж, чанар дээшлэх буюу үр ашиг, үр дүн нэмэгдэнэ
• Ажилтнуудын хандлага сайжирна
• Ажилтнуудын чадавх нэмэгдэнэ 
• Менежментийн тогтолцоо, хяналт сайжирна
• Процессын хяналт сайжирна
• Тасралтгүй сайжруулалтын соёл бий болно

Төсөл үргэлжлэх хугацаа

Байгууллагын үйл ажилагааны чиглэл, хэмжээнээс хамаараад 2–4 сарын хугацаанд хэрэгжинэ. Байгууллагын төрөл, хэмжээнээс хамаарахгүйгээр удирдлагын аль ч тогтолцоонд процессын хандлагыг нэвтрүүлэх боломжтой. 

Үндэслэл

Байгууллага нь зөвхөн дотоод орчин бус мөн гадаад хүрээлэл, орчноо сайн мэдэж, түүнд гарч буй буй өөрчлөлтүүд болон тэдгээрийн хандлагыг шинжлэн бодитой үнэлгээ, дүн шинжилгээ хийснээр өрсөлдөөнд амжилт олдог. Амжилтад хүрэх нь зөвхөн стратегийн удирдлагаар дамжин хэрэгждэгийг зах зээл хөгжсөн орнуудын туршлага нотолно. Стратегийн удирдлага нь байгууллагуудад харилцан адилгүй бөгөөд түүнийг хэрэгжүүлэх нийтлэг гол зарчмуудыг менежментэд тодорхойлсон байдаг. Иймд байгууллагын эрхэм зорилго, алсын хараанд хүрэхэд чиглэсэн онол арга зүй болон өнгөрсөн үеийн туршлага, ирээдүйн чиг хандлагад хийсэн дүн шинжилгээн дээр үндэслэн өрсөлдөөнд давуу тал, боломжийг олж авах иж бүрэн, цогц, урт хугацааны төлөвлөгөө боловсруулах нь стратегийн удирдлагын зорилго юм. 

Төсөл хэрэгжүүлснээр гарах үр дүн

Стратегийн менежмент нь ерөнхийдөө санхүүгийн болон санхүүгийн бус ашиг тустай гэж үздэг. Стратегийн менежментийн үйл явц нь байгууллага болон түүний удирдлагад ирээдүйн оршин тогтнох тухайгаа бодож, төлөвлөхөд тусалдаг бөгөөд энэ нь ТУЗ-ийн үндсэн үүрэг хариуцлагыг биелүүлдэг. Стратегийн удирдлага нь байгууллага болон ажилчдад чиглэсэн чиглэлийг тогтоодог. Нэг удаагийн стратеги төлөвлөгөөнөөс ялгаатай нь үр дүнтэй стратегийн менежмент нь байгууллагын үйл ажиллагааг тасралтгүй төлөвлөж, хянаж, туршиж үздэг бөгөөд ингэснээр үйл ажиллагааны үр ашиг, зах зээлд эзлэх хувь, ашиг орлого нэмэгддэг.

Төсөл үргэлжлэх хугацаа

Байгууллагын үйл ажилагааны чиглэл, хэмжээнээс хамаараад 3–6 сарын хугацаанд хэрэгжинэ.

Үндэслэл

“Чанарын дугуйлан” хөтөлбөр нь аливаа байгууллагын ажилтнууд сайн дурын үндсэн дээр нэгдэн баг болж, өөрсдийн ажлыг сайжруулж, харилцан өөрсдийгөө хөгжүүлэх замаар байгууллагын бүтээмж, чанарын үйл ажиллагаанд идэвхитэй оролцдог бүтээмж, чанар, үр ашгийг сайжруулах зорилго бүхий багийн цогц үйл ажиллагаа юм.

Уг хөтөлбөрийн хүрээнд нийт ажилчид чанарын дугуйлангийн талаар нэгдсэн ойлголттой болж, багаар асуудал шийдвэрлэх менежментийн аргууд болон статистикийн аргуудаас суралцаж, мөн хувь хүний хэв шинж багийн ажиллагаанд хэрхэн нөлөөлдөг талаар суралцаж, үйл ажиллагаагаа сайжруулах арга хэмжээг эдгээр аргуудыг ашиглан бие даан хэрэгжүүлдэг болох юм. 

Төсөл хэрэгжүүлснээр гарах үр дүн

Үйл ажиллагаанд Чанарын дугуйлангийн хөтөлбөрийг хэрэгжүүлснээр дараах үр дүн гарна. Үүнд:

• Аливаа асуудлыг системтэйгээр шийдвэрлэх;
• Бүтээгдэхүүн/үйлчилгээний чанарын хяналтыг сайжруулах;
• Ажлын байран дахь өндөр стандартыг хөнгөвчлөх;
• Багаар ажиллах чадварыг хөгжүүлэх бөгөөд сайн дурын шинж чанар нь гишүүдийн итгэл, ажлын сэтгэл ханамжийг нэмэгдүүлэх.

Төсөл үргэлжлэх хугацаа

Байгууллагын үйл ажилагааны чиглэл, хэмжээнээс хамаараад 3–6 сарын хугацаанд хэрэгжинэ.

Үндэслэл

Аливаа байгууллагын оршин тогтнох цорын ганц шалтгаан хэрэглэгчийн эрэлт хэрэгцээнд нийцсэн чанартай бүтээгдэхүүн эсвэл үйлчилгээг хүргэхэд оршдог. Иймд хэрэглэгчдийнхээ сэтгэл ханамжийг нэмэгдүүлэх бодлого, зорилтыг тодорхойлж, тэдгээрийг хэрэгжүүлэх процессуудын үр ашигтай, үр нөлөөтэй байдлын тасралтгүй сайжруулалтыг ханган ажиллах явдал аливаа байгууллага, аж ахуйн нэгж компаниудын дээд удирдлагын үндсэн үүрэг хариуцлага байдаг.

Энэхүү үүрэг хариуцлагаа амжилттай биелүүлэхэд төрийн эсвэл хувийн хэвшил, том жижгээс үл хамааран ямар ч байгууллагад “Чанарын менежментийн тогтолцоо”-г  бий болгон хэрэгжүүлэх үйл ажиллагаа чухал байдаг. Чанарын менежментийн тогтолцоог бүрдүүлэх олон улсын хэмжээнд хүлээн зөвшөөрөгдсөн шаардлагуудыг ISO 9000 бүлэг стандарт агуулсан байдаг ба төслийн хүрээнд ISO 9000/9001 бүлэг стандартын шаардлагад нийцсэн чанарын менежментийн тогтолцоог нэвтрүүлэх үйл ажиллагааг системтэйгээр хэрэгжүүлэхэд чиглэгдэнэ.

Төслийг хэрэгжүүлснээр гарах үр дүн

Энэхүү стандарт нь хэрэглэгчид төвлөрөх, удирдлагын манлайлал, үр нөлөө, процессын хандлага, тасралтгүй сайжруулалт зэрэг чанарын менежментийн 7 зарчимд суурилдаг. Олон улсын энэхүү стандартын дагуу чанарын менежментийн тогтолцоог нэвтрүүлснээр байгууллага дараах үр ашиг хүртэх боломжтой. Үүнд:

• Нийт ажилтнууд олон улсын стандартын шаардлагуудын талаар нэгдсэн мэдлэг ойлголттой болно.
• Баримтжигдсан чанарын менежментийн тогтолцоо бүрдэнэ.
• Бүтээмж дээшлүүлэх үйл ажиллагааг хэрэгжүүлнэ 
• Процессын давхардал, эзэнгүй процесс зэрэг үр ашиггүй байдлыг цаашид бууруулж тасралтгүй сайжруулалтыг хангах үндэс суурь бий болно.
• Баримт бичиг бүртгэлийн нэгдсэн сантай болж баримт бичгийн удирдлага эрс сайжирна.
• Хэрэглэгчийн хэрэгцээ шаардлагад нийцсэн бүтээгдэхүүн, үйлчилгээгээр тогтвортой хангах, улмаар хэрэглэгчийн сэтгэл ханамжийг нэмэгдүүлэх;
• Холбогдох хууль тогтоомж, зохицуулалтын бүх шаардлагад нийцэж байгаа эсэхийг баталгаажуулах.
• Олон улсын түвшинд хүлээн зөвшөөрөгдсөн БАТЛАМЖ-тай байгууллага болж нэр хүнд дээшилнэ.

Төсөл үргэлжлэх хугацаа

Байгууллагын үйл ажилагааны чиглэл, хэмжээнээс хамаараад 4–12 сарын хугацаанд хэрэгжинэ.